Մինչ Նիկոլ Փաշինյանը հայտարարում է, թե Կառավարությունը պլանավորում է մանկավարժների աշխատավարձը հասցնել աստղերին, իսկ գիտությունն ու կրթությունը երկրում դարձնել հիմնահենքային անկյունաքար՝ պայծառ ապագա կառուցելու, ԿԳՄՍՆ-ն շարունակում է փաստացի քանդել երկրի կրթական համակարգը՝ անիմաստ գաղափարներ հորինելով ու դրանք բռնի կերպով կյանքի կոչելով:

Բրյուսովի անվան պետական լեզվաբանական համալսարանն իշխանությունները մտադրվել են միավորել Մանկավարժականի ու Ֆիզկուլտ ինստիտուտի հետ, ինչին ի պատասխան բունտի են դուրս եկել լեզվաբանականի ռեկտորատը, ուսանողությունն ու դասախոսները՝ բացառելով 90-ամյա բուհի փաստացի ոչնչացումը կամ տարալուծումը:
Հայաստաում բուհերի միավորման գաղափարը ծնունդ է բացառապես հետհեղափոխական շրջանի: Դրա հեղինակները պնդում են, որ հայաստանյան բարձրագույն ուսումնական հաստատությունների՝ միմյանց մեջ տարալուծումը հանգեցնելու է ուսուցման որակի բարձրացմանն ու գիտության առաջընթացին՝ տալով հավելյալ ռեսուրսների հնարավորություն:
Թե կոնկրետ ինչ հաշվարկների հիման վրա են նան եզրահանգման եկել, դժվար է ասել, բայց այն, որ գաղափարն այս այսպես ասած գրանտային ծագում ունի, փաստ է: Մասնավորապես՝ ցայսօր անպատախան են մնում հարցերը, թե այդ ամենն ինչպե՞ս է լավացնելու հաղորդվող գիտելիքի որակը, ինչպիսի՞ ազդեցություն է ունենալու ուսանողության ու պրոֆեսորադասախոսական կազմի աշխատանքի վրա, առհասարակ ի՞նչ է տալու դա Հայաստանի կրթական համակարգին, այն դեպքում, երբ դրա իրականացման գործիքակազմերն անգամ մնում են անորոշ ու թերի:
Ակնհայտորեն գործ ունենք Հայաստանում կրթության ու գիտության հիմնավոր քայքայման հետ, ինչում մեծապես շահագրգիռ են հատկապես Հայաստանի ոչ բարեկամ կամ թշնամի երկրները՝ նկատի ունենալով գիտության ու կրթության դերը՝ ժամանակակից աշխարհում առկա բազմաշերտ խնդրների հաղթահարման հարցում: Որքան տեխնոլոգիապես զարգացած է երկիրն, այնքան ամուր է նրա անվտանգային համակարգը, սոցիումը՝ ավելի բարեկեցիկ:

Այն ուժերը, որոնք ակնհայտ ազդեցություն ունեն Հայաստանի ներկայիս իշխանությունների վրա, բնավ շահագրգիռ չեն Հայաստանի առաջընթացով կամ մեր երկրի անվտանգային համակարգի ամրապնդմամբ: Ա՛յ հենց այդ ուժերի ծնած գաղափարն է բուհերի միավորման արկածախնդիր այս պրոյեկտը, որն էլ դրսի թելադրանքով կյանքի է կոչում ՀՀ վայ կառավարությունը:

Գ.Մ.