Արցախցին սովոր է առանց գազ մնալ, բայց սովոր չէ այն խարդավանքներին, որ տեսնում է իր շուրջը։

Ինչ-որ պատգամավոր հանրությանը հիշեցրեց, որ արցախցին պիտի հարմարվի այդ վիճակին։ Մենք առանց լույսի ու ջրի էլ կարողանում ենք ապրել, բայց վայը տարել է նրան, որ այս կյանքի համը երբևէ չի զգացել ու չգիտի ապրելու գինը, և եթե ոմանք անիմաստ ճառ ասելով են ապրել, մենք լույս փնտրելով, ջրի կաթիլներ հավաքելով, կրակի բերանում ենք կոփվել...
Մենք լսում ենք, որ Միացյալ Նահանգների նախագահը մեր դեմ պատերազմ սանձազերծած երկրի «նովրուզ» կոչվող տոնն է շնորհավորում։ Ինչպիսի՜ ուշադիր վերաբերմունք, հարկավոր է հիշեցնել այդ ծերուկին, որ առաջիկայում հայերն էլ Զատիկ ունեն նշելու։
ՀՀ արտաքին գործերի նախարարը չի ուզում «կարմիր գիծն» անցնել ու խոստովանել` Արցախը ադրբեջանակա՞ն, թե՞ հայկական տարածք է, բայց Ազգային ժողովի ամբիոնից պարզաբանում է, թե ինչու ցեղասպան երկրի արտաքին գործերի նախարարն առանց փողկապի էր, և ինչու էր նրա հետ հանդիպմանը ինքը լայն ժպտում, բայց մոռացավ պարզաբանել նրանց կողմից իր անվան աղավաղման պատճառը։
Բարդ ժամանակներ ենք ապրում, մեր բազմաչարչար կյանքում ճառասացներն այնքան են շատացել, մենք լռում ենք, որ ապրելու համառ կամքով դիմադարձ լինենք մեր դեմ հյուսած խարդավանքներին։

Նատաշա Պողոսյան