«Լուսանկարում Ստամբուլի «մամա Ռոզան» է, իսկական անունը Բավական է, ազգանունը` Այվազյան: Այս կինն ունի ՀՀ քաղաքացիության 4 անձնագիր: Նա Հայաստանից, մասնավորապես Վանաձորից, Շիրակի մարզի տարբեր քաղաքներից հայուհիներին խափելով տանում է Թուրքիա և տարբեր հասարակաց տներում աշխատացնում»,-լրագրողների հետ հանդիպման ժամանակ ներկայացրեց տարածաշրջանային հարցերով փորձագետ-վերլուծաբան Սարգիս Հացպանյանը:

«Հետաքրքիր է, որ ՀՀ կողմից հետախուզվող այս կնոջը չեն կարողանում բռնել: Ես այս կնոջ տունը գիտեմ, ձեռքի հեռախոսը գիտեմ, որտեղ է ապրում, դա նույնպես գիտեմ: Ստամբուլում այնպիսի մարդ չկա, որ նրան չճանաչի, բայց ձայն բարբառո հանապատի: Նման կանայք շատ կան, իհարկե, բայց սա առանձնահատուկ երևույթ է: Իսկական հանցագործ է: Վերջերս Հրազդան քաղաքից երեք աղջիկների է տարել, պոլսահայերն այդ երեք աղջիկներին գտել, հանել էին այդ հասարակաց տնից ու ասել` մենք ձեզ որքան պետք է գումար կտանք, միայն թե գնացեք»,- ասաց նա:

Հացպանյանի խոսքով` այս տիկնոջն ականջից բռնելը և Հայաստան բերելը մի ժամվա պատմություն է:

«Եթե Գասպարյան Վովան չի կարող դա անել, Հացպանյան Սարգիսը կանի` առանց խնդրի: Նման կանայք շատ կան: 25 տարի է` գիտեն, թե այդ աղջիկներին ուր են տանում ու ինչի համար, բայց ես երբևէ չեմ լսել, որ Հայաստանի պատկան մարմինները որևէ գործողություն անեն սա կանխարգելելու համար, կամ օրինակ` հայ համայնքի հետ աշխատեն: Մի քանի ժամվա ընթացքում նրանց հետ համագործակցելով` հնարավոր է նրանց առանց խնդրի միանգամից դեպորտի եթարկել»,- նշեց նա՝ հավելելով, որ այս հանգամանքն օգտագործվում է թուրքերի կողմից:

«Էրդողանն էլ ասում է՝ ես եմ կերակրում հայերին, ես չլինեմ` այս հայերը սոված կմեռնեն: Դա ամոթ չէ՞: ՀՀ իշխանությունները դրանից գետնի տակ չե՞ն մտնում: Իսկ օլիգարխնե՞րը, որ իրենք իրենց բարեգործ են ձևացնում: Չե՞ն կարող աշխատատեղեր ստեղծել, որ այդ հատվածն այստեղ աշխատի ու չգնա մարմինը վաճառի»,- նեղսրտեց բանախոսը: 

Հացպանյանը մի կարևոր հանգամանք առանձնացրեց. «Յուրաքանչյուր դեպորտի ենթարկված ՀՀ քաղաքացի մեկ ամիս հետո էլի հայտնվում է Թուրքիայում այլ անձնագրով, այլ անուն, ազգանունով: Ես նման երկու մարդկանց եմ ճանաչել: Նրանցից մեկն ասաց` Սարգիս ջան, ինձ դեպորտի ենթարկեցին, փող տվեցի, անձնագրումս անունս փոխեցի ու վերջ: Եթե դեպորտ անեն, կգամ ու էլի կփոխեմ: Այստեղ փողը տալիս ես, անմիջապես հարցերը լուծվում են: Փաստորեն, ինչքան հեշտ է, որ գնաս Անձնագրային և վիզաների վարչություն, անուն, ազգանունդ փոխես ու նոր մի անձնագիր ստանաս: Ես դիմում եմ ՀՀ ոստիկանությանը` Անձնագրային և վիզաների վարչությունը պետք է զբաղվի այդ կրկնակի, եռակի և գուցե քառակի անձնագրերով, և հատկապես դրանց տվյալներով»:

Նյութի աղբյուրը `newsbook.am