Մեկնաբանելով շաբաթ օրը տեղի ունեցած խայտառակությունն, երբ մի խումբ երիտասարդների կողմից Երևանում՝ Օպերային թատրոնի շենքի դիմաց, փորձ էր արվել նշել «մարիխուանայի օրը», Ազգային ժողովի «Իմ քայլը» խմբակցության պատգամավոր Նիկոլայ Բաղդասարյանը խոստովանել է, որ սկանդալային միջոցառման կազմակերպիչն իր երղբայրն է եղել:

«Ես իմ ազգականների, նրանց մտքերի կամ տեսակետների հետ չեմ ցանկանում նույնականանալ։ Իրենք ազատ են իրենց որոշումներում։ Ինչ վերաբերում է իմ անձին՝ ես այդ թեմայից հեռու եմ և չեզոք։ Իսկ մեր ընտանիքը բավականին մեծ է, նրանք ապրում են լրիվ տարբեր տեսակետներով»,-լրագրողներին ասել է իմքայլականը:
Միաժամանակ պատասխանելով Հայաստանում մարիխուանայի օրինականացմանն առնչվող հարցին՝ փաշինյանական պատգամավորն ասել է. «Ես որոշ ժամանակ ԱՄՆ-ում եմ անցկացրել, գիտեմ, որ այնտեղ օրինական է, Վրաստանում օրինական է, մի քանի պետություններում մահապատիժ է նախատեսվում, հետևաբար՝ այդ հարցը պետք է խորությամբ ուսումնասիրել, որովհետև ընկերներ ունեմ, որոնք օգտագործում են, պայքարում են մի այլ կարգի, ընկերներ ունեմ, որ դեմ են դրան։ Պետք է խորությամբ ուսումնասիրել, եթե լավ բան է, կողմ ենք, եթե վատ բան է, դեմ ենք։ Ես ընդհանրապես չեմ օգտագործել, նույնիսկ սիգարետ չեմ օգտագործում»:
Այն, որ Հայաստանում հեղափոխությունից հետո նկատվում է հստակ միտում՝ ամեն գնով երկիր բերելու արևմտյան հոռի բարքերն ու դրանք տեղայնացնելու, ակնհայտ դարձավ այն օրվանից, երբ ԱԺ ամբիոնը վերածվեց տրանսգենդերի խոսափողի, ում ի պաշտպանություն Փաշինյանը շտապեց հռետորական հարց հնչեցնել՝ տրանսգենդերը ելույթ ունեցածը մա՞րդ է, թե՞ չէ: Ընդ որում՝ Փաշինյանի հարցը, պետք է նկատել, ամենևին էլ տեղին չէր, քանի որ հարցը ոչ թե ինչ-որ մեկին մարդ կամ անասուն խոստովանելն էր, այլ համասեռամոլության քարոզի լինել-չլինելը մի երկրում,որը շատ է սիրում պարծենալ իր ավանդական հասարակությամբ ու դավանած անանց արժեքներով:
Հիմա, փաստորեն, բանը հասել է պլանքյաշենրին մարդ համարել-չհամարելուն, և ակնկալելի է, որ նույն Փաշինյանը հիմա էլ ի պաշտպանություն մարիխուանայի է նույնքան հռետորական հարց բարձրացնելու՝ ասենք ««պլանը» խո՞տ է, թե՞ կոկորդիլոս» տեսքով: Դե գնա ու պատասխանի…

Իմքայլականը, փաստորեն, խոստովանում է, որ «մարիխունայի օրը» Հայաստանում տոն դարձնելուն միտված ակցիայի կազմակերպիչն իր՝ միյանցից տարբեր գաղափարներ ու արժեքներ դավանող ընտանիքի անդամներից մեկն է՝ միաժամանակ խուսափելով ասոցացվել «պլանքյաշության» հետ:
Ավելին՝ անձամբ խուսափելով պիտակավորվելու արժանանալուց՝ պատգամավորն, ում կողմից ներկայացվող քաղաքական ուժի ընդունած որոշումներով է այսուհետ կառուցվում «նոր» Հայաստանի ապագան, փաստացի չի բացառում պլանքյաշության օրինականացումը Հայաստանում՝ օրինակ բերելով, մասնավորապես, հարևան Վրաստանը և կասկածի տակ դնելով մարիխուանա օգտագործելու քայքայիչ հետևանքները:
Ինչո՞ւ է «Իմ Քայլը» փորձում ամեն գնով քայքայել հասարակական բարոյականության տարրական նորմերը: Պատասխանը, որքան էլ կարող է անակնկալ լինել, միանգամայն պրիմիտիվ է. Ալեն Սիմոնյանն ԱՄՆ-ում մարիխուանայի դաշտե՞ր ունի և, ըստ էության, նման կերպ ցանկանում է իր բերքի սպառման համար նորանոր շուկաներ նվաճել՝ ի դեմս նիկոլական Հայաստանի:
Ի դեպ՝ Սիմոնյանը, պարզաբանելով 124 մլն-ին առնչվող սկանդալային պատմությունը, նույն օրը լրագրողների հետ ճեպազրուցում հայտարարել է. «Խոսքը 124 մլն դրամի փուչիկ գնելու մասին չէ, այլ քաղաքացու գերակայությունը հաստատելու. դա հերթական տոնախմբությունը չէ, դա շատ կարևոր մի իրադարձության արձանագրում է»:
«Քաղաքացու օր» կոչվող խեղկատակության հեղինակները փաստացի լծվել են երկիրն ամայացնելու, բարոյազրկելու այլանդակ գործին՝ ելնելով, իհարկե, Ալեն Սիմոնյանի բիզնես շահերից:
Սրանց թվում է,որ եթե սկսեն անգամ մասսայական օնանիզմով զբաղվել, ասենք, հանրային վայրերում, կրկին կարժանանան հասարակության հավանությանը: Չէ՞ որ իրենց 80%-ից ավել ձայն են տվել, չէ՞ որ սափրվելու հետ սեր չունեցող ինչ-որ մեկը բարեկեցություն ու «նոր» Հայաստան է խոստացել, ու հիմա այդ «նոր» Հայաստանն էլ հենց կերտում են՝ փորձելով անբարոյականություն սերմանել:
Դե եթե դա է պահանջում Ալեն Սիմոնյանի բիզնես շահն՝ ո՞վ ի՞նչ կարող է ասել. ուրեմն՝ այդպե՞ս է ճիշտ: