Էջմիածնում արդեն երկու օր է՝ իրականացվում է ավտոերթ-իրազեկում, այս պահին ավտոերթ է իրականացվում նաև Զվարթնոց համայնքում: Ավտոերթը կազմակերպվել է «Ազատ Քաղաքացի բաց ինստիտուտ» ՀԿ-ի կողմից, որը նախատեսում է նաև Էջմիածնում հունիսի 14-ին հանրահավաք իրականացնել «Էջմիածինը Գրիգորյաններից ազատագրելու»՝ քաղաքապետ Կարեն Գրիգորյանի հրաժարականի և արտահերթ ընտրություններ կազմակերպելու պահանջով:
Tert.am-ի հետ զրույցում Էջմիածնի քաղաքապետ Կարեն Գրիգորյանն ընդգծեց, որ իր հրաժարականի պահանջ կարող է դրվել ժողովրդի կողմից, ոչ թե հրահրողների:
«Թող իրենք իրենց անելիքն ու ասելիքը կազմակերպեն, շինծու մեղադրանքների փաթեթի պատասխանը կտամ։ Երթի համար չեն դիմել, իրենք թող որոշեն՝ գործողությունների որ մասն են ուզում օրինական անել, որ մասը՝ անօրինական։ Ես չեմ գնահատական տվողը, միայն ասեմ, որ քաղաքապետարան չեն դիմել երթի համար, դիմել են հունիսի 14-ին հավաք-համերգ իրականացնելու համար, քաղաքապետարանն ընդունել է ի գիտություն»,-շեշտեց նա:

Անդրադառնալով հարցին, որ «Ազատ Քաղաքացի բաց ինստիտուտ» ՀԿ-ի ղեկավար Արտակ Սերգոյանն իրեն մեղադրում է թալանի մեջ՝ Կարեն Գրիգորյանն ասաց. «Երկու օր առաջ հարցազրույցի ընթացքում դեբատի հրավիրեցի հրահրող կազմակերպչին (Արթուր Ասատրյանին). ես վստահ էի, որ չի գա և չեկավ: Թող վերջնական կողմնորոշված իրենց գործողություններն անեն, ամբողջական պատասխանն էլ կստանան»,-եզրափակեց Կարեն Գրիգորյանը՝ հորդորելով սպասել զարգացումների ընթացքին:

Կարեն Գրիգորյանն ասաց, որ սադրանքներին չի տրվելու, և իր աշխատանքին պիտի գնահատական տա Էջմիածնի ժողովուրդը:

Հիշեցնենք, որ «Արթուր Ասատրյան Հիմնադրամ» ֆեյսբուքյան էջում Արթուր Ասատրյանն արձագանքել էր դեբատի հրավերին. «Ի պատասխան Կարեն Գրիգորյանի առաջարկի՝ ուզում եմ նրան ևս մեկ անգամ հստակ հիշեցնել, որ իմ տված հարցազրույցի ժամանակ ես ինքս հրավիրեցի Մանվել Գրիգորյանին դեբատների, որից առ այսօր արձագանք չեմ ստացել: Կարեն Գրիգորյանի հետ երկխոսության իմաստ չէի գտնում, այլապես անձամբ իրեն կհրավիրեի»,-ասել էր նա՝ հորդորելով Էջմիածնի բնակիչների պայքարը չվերագրել իրեն:
Հիշեցնենք, որ Էջմիածնում նաև հակընդդեմ բողոքի ակցիա է նախատեսված նաև հունիսի 16-ին: 
Իրազեկման մեջ, մասնավորապես, նշված է. «Էջմիածինցին պետք է տեր կանգնի իր արժանապատվությանը, իր ընտրությանը, վստահության քվեին, որ տվել է քաղաքապետ Կարեն Գրիգորյանին: Եվ ուրեմն՝ շաբաթ օրը՝ հունիսի 16-ին, ժամը 17:00-ից դուրս արի հրապարակ` ցույց տալու, որ Էջմիածնի և էջմիածինցու ճակատագիրն իր ձեռքերում է, այլ ոչ թե այլ երկրներից, քաղաքներից և համայնքներից եկածների։ Սիրելի՛ էջմիածինցիներ, այս եկվորները, իրենց բնավորության համաձայն, ընդամենը մի քանի օրից, ժողովրդին մոլորության մատնելու անհաջող փորձերից հետո գլխակորույս փախչելու են երկրից, Էջմիածնում մնալու ենք նորից մենք` էջմիածինցիներս, ապրելու, արարելու և շարունակելու ենք շենացնել մեր սիրելի քաղաքը»։