Բարձրաստիճան անձանց էթիկայի հանձնաժողովի վերաբերյալ Հայաստանում կարծիքները չափազանց իրարամերժ են: Հասարակության շրջանում այս կառույցի մասին ձևավորված հիմնական պատկերացումները բացարձակապես դրական չեն, ինչը պայմանավորված է այն իրականությամբ, որը կա ու մշտապես առկա է եղել հայաստանյան կյանքում:

ՀՀ ոստիկանապետ Վլադիմիր  Գասպարյանը, պարզվում է, օրերս Բարձրաստիճան պաշտոնատար անձանց էթիկայի հանձնաժողով է ներկայացրել իր և ընտանիքի անդամների նախորդ տարվա եկամուտների և գույքի հայտարարագիրը:
Պետք է նկատել, որ Գասպարյանի պարագայում նույնպես, ինչպես և հայաստանյան չինովնիկական սթաֆի 99 %-ի, պատկերը նույնն է. կինը շատ ավելի մեծ ունեցվածք ունի, քան՝ ամուսինը:
Այսպես՝ հայտարարագրից պարզում ենք, որ Վլադիմիր Գասպարյանի 2017 թ. եկամուտը կազմել է 7,058,916 ՀՀ դրամ, որը գոյացել է բացառապես «աշխատանքի վարձատրություն և / կամ դրան հավասարեցված այլ վճարումներից»: Դրա հետ մեկտեղ, պարզվում է, Վլադիմիր Գասպարյանի դրամական միջոցների չափը կազմում է ընդամենը 3,000,000 ՀՀ դրամ և 2000 ԱՄՆ դոլար:
Ինչ վերաբերում է կնոջն, ապա նույն փաստաթղթից պարզ է դառնում, որ նա ամուսնուց անհամեմատ ավելի հարուստ է: Տիկնոջ եկամուտները նախորդ տարում կազմել են 3,327,534 ՀՀ դրամ, ինչպես և ամուսնու պարագայում, ամբողջությամբ գոյացել է «աշխատանքի վարձատրություն և/կամ դրան հավասարեցված այլ վճարումներից»: Մինչդեռ դրամական միջոցների չափը հասնում է 30,000,000 ՀՀ դրամի, 18,000 ԱՄՆ դոլարի և 24,000 եվրոյի:
Հայաստանում, ի տարբերություն շատ ու շատ երկրների, գրեթե անհնար է թաքցնել սեփական ունեցվածքը:
Ասվածը վերաբերում է ոչ միայն շարքային քաղաքացիներին, այլև նույնիսկ ամենաբարձրաստիճան չինովնիկներին: Հայաստանում բոլորը բոլորի մասին ամեն բան գիտեն՝ հատկապես ունեցվածքի մասով: Սույն հանգամանքից բխում է հարց՝ որքանո՞վ կարող է Վլադիմիր Գասպարյանի այս հայտարարագիրը նպաստել Բարձրաստիճան պաշտոնատար անձանց էթիկայի հանձնաժողովի՝ հասարակության շրջանում ունեցած վարկանշի բարձրացմանը:
Առնվազը 1 տարեկան երեխա պետք է լինել՝ չհասկանալու, որ նմանօրինակ հաշվետվություններն ընդամենը համեստության քողով պատված շղարշ են՝ մարդկանց աչքերի համար նախատեսված՝ համեստի մեջ քողարկելու ահռելի կարողությունը:
Գասպարյանի բյուրավոր միլիոնների (ԱՄՆ դոլարով) մասին առասպելներն անգամ ԱՄՆ են հասել այն պարագայում, երբ, եթե հավատալու լինենք հայտարարագրին, Գասպարյանի ունեցվածքն իրականում ընդամենը շարքային մենեջերի ունեցվածքի չափ է կազմում: Ո՞ւմ են փորձում խաբել՝ անհասկանալի է: Անհասկանալի է նաև այն միամտությունը, որը ամեն անգամ դրսևորվում է Բարձրաստիճան պաշտոնատար անձանց էթիկայի հանձնաժողովի կողմից:
Ակնհատ է, որ, եթե խնդիր կա հասարակության վստահությունը նմանօրինակ կառույցների հանդեպ բարձրացնելու, ապա պետք է դրանց օժտել իսկապես բացահայտողական ֆունկցիաներով, այլ ոչ թե մարդկանց աչքերին թոզ փչելու ու իրականությունը խեղաթյուրելու համար պետական ֆինասավորում հատկացնել:
Միայն թե հարցն այստեղ այն է, թե որտեղից Ոստիկանության գեներալ-գնդապետին այդքան շատ փող…