«Հայկական ժամանակ»-ը գրում է

ՀՀԿ խոսնակ, ԱԺ փոխնախագահ Էդուարդ Շարմազանովը ՀՀԿ ԳՄ նիստից հետո անդրադարձավ փետրվարի 13-ին Երեւանի քաղաքապետարանում տեղի ունեցած սկանդալին, որի ժամանակ Երկիր Ծիրանի կուսակցության անդամները քաղաքապետ Տարոն Մարգարյանին «նվեր» էին բերել՝ Նուբարաշենի կոյուղու գարշահոտ ջուրը, ի նշան այն բողոքի, որ բնակիչները շնչում են այդ հոտը:

«ՀՀԿ-ն ոչ քաղաքակիրթ, ոչ կոռեկտ, ոչ էթիկայի սահմաններում ցանկացած քայլ անթույլատրելի է համարում: Միեւնույն ժամանակ խնդիրը գտնվում է իրավապահների տիրույթում եւ ես չեմ ուզում մեկնաբանություն անել՝ այնտեղ բռնություն եղել է, թե՝ ոչ, որ կողմն է բռնություն կատարել, որն է բռնության ենթարկվել: Իմ համար տարօրինակ են սեռական բռնության մասին ելույթները, որովհետեւ չի կարելի ամեն ինչ արդարացնել: Ես տեսանյութը նայել եմ եւ այնտեղ սեռական բռնություն չեմ նկատել: Երկիր Ծիրանիի մեր գործընկերների պահվածքը համարում եմ ոչ քաղաքակիրթ, ոչ քաղաքական: Երեւանի քաղաքապետարանը ախոռագոմ չէ: Ես համամիտ եմ Անահիտ Բախշյանի հետ, որը նշել էր՝  դժվար է պատկերացնել, որ երեք կին իրենց նման կերպ կպահեին եւ համամիտ եմ Դավիթ Խաժակյանի հետ, որ նա կողմակից է խոսքի ազատությանը, բայց այն ինչ տեղի ունեցավ դա խոսքի ազատության հետ կապ չունի»,- ասաց Շարմազանովը:

Նա միաժամանակ անընդունելի համարեց այն անձանց, որոնք սատարում են Զարուհի Փոստանջյանին

«Ես անընդունելի եմ համարում այն մարդկանց, ակտիվիստներին, որոնք փորձում են իշխանություններին քննադատելու համար ամեն կերպ արդարացնեն այն ոչ քաղաքակիրթ եւ ոչ կոռեկտ պահվածքը, որը ցույց տվեցին Զարուհի Փոստանջյանն ու կուսակիցները: Չի կարելի ամեն ինչն արդարացնել»,- ասաց նա:

ՀԺ-ի հարցին՝ եթե ՀՀԿ-ն քաղաքակիրթ էր, ինչու՞ ԵԾ-ի ավագանիներին քաղաքակիրթ չպատասխանեց, Շարմազանովը հարցով պատասխանեց. «Եթե ընդդիմությունն աներ իշխանության նկատմամբ, այդ հարցը կտա՞յիր»: Դրական պատասխան ստանալուց հետո, ԱԺ փոխխոսնական ասաց. «Կապրենք, կտեսնենք»: