Մի բան է լինել պարզ մեկը, և բոլորովին այլ բան` Ազնավուր:
Ի՞նչ է ասել Ազնավուրը Հայաստանի մասին` մի երկրի, որի համար նրա սիրտը շատ ավելի է ցավում, քան մերօրյա բազմաթիվ ղեկավարների ու պետական պաշտոն զբաղեցնողների: Նա, փաստացի, հակիրճ կերպով նկարագրել է այն դաժան իրականությունը, որն այսօր տիրում է Հայաստանում:
«Երբ մեկը երկու ձու է գողանում, նրան բանտարկում են, մինչդեռ այն մարդիկ, որոնք միլիոններ են գողանում, մնում են անպատիժ»,- ֆրանսիական Nouvellesd’Armenie-ին ասել է Ազնավուրը` ըստ էության, կոչ անելով փոխել այս իրավիճակն ու երկրում արդարության մթնոլորտ հաստատել` առանց որի նորմալ պետություն կառուցելն անհնարին բան է:
Ազնավուրն իր խոսքում նաև նշել է, թե Հայաստանում այնքան էլ ամեն բան վատ չէ. հիմնական խնդիրը կոմունիստական հասարակարգի թողած դրոշմն է, որից ամբողջապես ազատվելու համար դեռ մի քիչ ճանապարհ պետք է անցնել:
Ինչ խոսք`Ազնավուրի ասածը միանգամայն տրամաբանական է ու իրականությունից բխող, սակայն այս հարցազրույցում հատկապես ուշագրավ է Ազնավուրի խոսքի այն հատվածը, որում նա կոմունիստական մնացուկներից ազատվելու կոչ է անում: Ի՞նչ է սա, Ազնավուրի պարզ համոզմո՞ւնք, թե՞ աշխարհաքաղաքական ենթատեքստ պարունակող կոչ:
Վերջիվերջո Ազնավուրը մեկ անգամ չէ,որ քննադատել է Հայաստանի իշխանություններին երկրում սոցիալ-տնտեսական վիճակի և կամ անարդար համակարգ ունենալու համար, սակայն երևի թե սա առաջին անգամն է,որ իր խոսքում Ազնավուրը շատ ավելի խորքային հարց է բարձրացնում. նրան թվում է,թե Հայաստանում դեռևս կենդանի է կոմունիզմի ուրվականը, որն էլ ընկած է մեր բոլոր դժբախտություննեի հիմքում:
Իհարկե, կոմունիզմին իսկական կարմիր ժանտախտ է, անկասկած, սակայն հարցն այստեղ ավելի շատ այն է, թե ինչ կարևոր իրադարձության ֆոնի ներքո է Ազնավուրը նման կոչ հնչեցնում:
Ազնավուրի խոսքերում, ըստ էության, արտացոլվում է Արևմուտքի իրական ակնկալիքը Հայաստանից, այն է`տեսնել մի Հայաստան` ձերբազատված նախորդ հասարակարգին բնորոշ բոլոր վատ գծերից: Չտեսնել այստեղ վերջերս ստորագրված ՀՀ-ԵՄ հռչակագրի որոշակի արձագանքներ, ուղղակի անհնար է: Եվրոպան փաստացի Ազնավուրի միջոցով է իր ասելիքը փորձում տեղ հասցնել:
Ինչ խոսք` մեծ շանսոնյեի խոսքերը բխում են այսօրեական այն խնդիրներից, որոնց քաջածանոթ է ցանկացածին, ով բնակվում է Հայաստանում` արդարության պակաս, սոցիալական անարդարություն և այլն: Սակայն այստեղ հարցն այն է, թե արդյոք Արևուտքի նախանշած ուղին չի՞ հանգեցնի Հայաստանի համար կործանարար հետևանքների: Ակնհայտ է, թե ինչ է նշանակում կոմւնիզմից ձերբազատում: Դա, ըստ էության, կոչ է` ձերբազատվելու Ռուսաստանի ազդեցությունից` մի բան, որը կարող է անկանխատեսելի հետևանքների հանգեցնել:

Այսինքն`կրկին առաջ է քաշվում «կամ կամ»-ի սկզբունքն, այս անգամ, սակայն, շատ ավելի նրբորեն` մշակույթի լեզվով է այդ մասին ասվում: