Հոկտեմբերի վերջին ամերիկացի հանրահայտ կինոռեժիսոր, սոցիալական ու քաղաքական սուր երգիծանքի ժանրում աշխատող վավերագրական ֆիլմի վարպետ, գրող, լրագրող ու քաղաքական ակտիվիստ Մայքլ Մուրը ներկայացրել է իր՝ «Ուրիշ էլ ո՞ւր ԱՄՆ –ն կարող է ներխուժել» (Where to Invade Next) նոր ֆիլմի առաջին անոնսը: Եվ չնայած ֆիլմը վարձույթում չի հայտնվել, բայց այն արդեն հասցրել է մեծ աղմուկ հանել: Այսինքն այն ամենը, ինչ վերաբերում է Մուրին, ԱՄՆ –ում միշտ աղմուկ է առաջացնում:

Ինչպես հայտնում է The Hollywood Reporter–ը, ամերիկյան կինոասոցիացիան մտադիր չէ փոխել Մայքլ Մուրին ֆիլմին հատկացված վարկանիշը ՝ վկայակոչելով ասոցացիայի վերաքննիչ հանձմաժողովի որոշումը:

Ավելի վաղ ֆիլմին հատկացվել էր R խիստ վարկանիշը, ըստ որի 17 տարեկանից ցածր անձանց այդ ֆիլմի դիտումը կթույլատրվի միայն եթե նրանց կուղեկցի ծնողներից մեկը կամ էլ օրինական ներկայացուցիչը: Նման որոշում ասոցացիան կայացրել է ֆիլմում անվայել հայհոյանքների, բռնության, թմրադեղերի գործածման ու մերկ տեսարանների առկայության պատճառով:

Մուրի կարծիքով ասոցիացիան կողմնապահ է վերաբերվում իրեն: «Թող այդ դեպքում իմ ֆիլմի վրա գրություն փակցեին «ֆիլմը պարունակում է վտանգավոր գաղափարներ, որոնք կտխրեցնեն ու խռովության կդրդեն հանդիսականի 99 տոկոսին», - ասել է ռեժիսորը:

Ֆիլմում ռեժիսորն ինքը տարբեր երկրներ է այցելում ԱՄՆ դրոշով ոււ նախազգուշացնում իրենց ներխուժման մասին: Ամերիկյան մեծ վարձույթում ֆիլմը պետք է հայտնվի հունվարի 15-ին: