«Հայաստանի նոր քաղաքական մշակույթ» կուսակցության նախագահ Անի Զախարյանը պատրաստվում է մասնակցել 2017 թվականի խորհրդարանական ընտրություններին և համոզված է, որ հիշյալ փաստը պիտի շահագրգռի բոլոր քաղաքական, բոլոր հասարակական ուժերին: Իսկ գրգռվելու համար նա ունի շատ ծանրակշիռ հիմնավորում. «Ես գիտեմ, որ մենք ունենք բավարար վստահություն, և հատկապես իմ անձն ունի բավարար հանրային վստահություն: Դրանում ես համոզվում եմ ամեն օր, ամեն քայլափոխի, տարբեր շփումներում»:

Սակայն միայն այս հանգամանքը չէ, որ Զախարյանին մղում է իր անձը ներկայացնելու օրենսդիր մարմնում: Կան ավելի վեհ նպատակներ և դրանցից առավել հայտնին, ինչ խոսք, շարունակում է մնալ կնոջ կուսության թեմատիկան: Սա հատկապես հետաքրքիր է դիտվում, երբ Զախարյանն այն փորձում է մատուցել կանանց իրավունքների պաշտպանության դիտանկյունից: «Այդ խնդիրները կրկին մնում են «Հայաստանի նոր քաղաքական մշակույթ» կուսակցության ծրագրում:

Ի սկզբանե այդ բոլոր խնդիրները բարձրաձայնել ենք այդ տեսանկյունից, դա կոնֆորմացիաների է ենթարկվել և հավուր պատշաճի չի ընդունվել հասարակության կողմից»,- ասում է նա՝ անելով մի այնպիսի կտրուկ, անսպասելի շրջադարձ, որ կարող է շատերի զարմանքը շարժել:

Պարզվում է, որ տաբու դարձած թեմաները լավ մշակելուց և փաթեթավորելուց հետո կարելի է հասարակությանը հրամցնել իրավասոցիալական խնդիրների շրջանակներում: Եվ հիմա Զախարյանի կուսակցությունը հենց այդպես էլ վարվելու է՝ պաշտոնապես Հայաստանի կառավարությանը ներկայացնելու է իրավասոցիալական փաթեթ, և պահանջելու է հանդիպում վարչապետի հետ: Թե ինչի կհանգեցնեն նման քայլերը, դեռ ոչ ոք չգիտի, ինչպես որ անհայտ է մնում հանրության վստահությունը Զախարյանի կուսա-բարոյական թեզերի հանդեպ:

Բայց որ առաջիկա ընտրությունների քարոզարշավը ֆեմինիստական զեղումների պակաս չի զգա, իսկ կուսության կատեգորիան կբնորոշի դրա դեգրադացման աստիճանը, այդ մի բանը Անի Զախարյանը խոստանում է: Ի վերջո, եթե դիտարկելու լինենք այս ամենը համեմատության մեջ, ապա «ազատամիտ» կնոջ հավակնությունները իրենց ներքին էությամբ շատ նման են քաղաքական մյուս ուժերի նկրտումներին, որոնք նույնպես վաղուց կույս չեն ու բարոյական հեռու են:

shame.am