«Հրապարակ»-ը գրում է. Երեկ Կառավարության կայքում զետեղված էր վարչապետի ժամանակավոր պաշտոնակատար Կարեն Կարապետյանի եւ ԱՄՆ դեսպան Ռիչարդ Միլզի հանդիպման մասին տեղեկատվություն, որտեղ նշված էր․ «Ես հասկանում եմ, որ այս ցույցերը, քաղաքացիական անհնազանդության գործողությունները հանդիսանում են օրենքի խախտում, և կառավարությունը պարտավոր է ապահովել հասարակական կարգն ու անվտանգությունը հնարավորինս լավ: Ես վստահ եմ, որ ժողովրդավարության կամ ժողովրդավարության ամրապնդման ճանապարհը նա չէ, որ վարչապետի թեկնածուն ընտրվում է փողոցում՝ ցույցի ժամանակ»։

Այս խոսքերը մեծ աղմուկ առաջացրեցին, նախ՝ այն պատճառով, որ ԱՄՆ կառավարությունն ու իր դիվանագետները, որպես կանոն, չեն միջամտում այլ երկրների ներքին կյանքին եւ շատ զգույշ են արտահայտվում, բացի այդ՝ այս խոսքերով դեսպանն անուղղակիորեն հասկացրել էր, որ այս շարժումն ու հանրահավանքները իրենց սրտով չեն։
Սակայն հաղորդագրությունից ժամեր անց, դեսպանատունն ու կառավարությունը հայտարարություն տարածեցին՝ պարզաբանելով, որ սխալ թարգմանություն է եղել․ «Վարչապետի ժամանակավոր պաշտոնակատարի աշխատակազմը և ԱՄՆ դեսպանությունը ցավով նշում են, որ այսօր կառավարության աշխատակազմի կողմից ներկայացված մամլո հաղորդագրության մեջ դեսպան Միլսին վերագրվող խոսքը Դեսպանի մեկնաբանությունների ու ԱՄՆ կառավարության դիրքորոշման սխալ թարգմանություն է: Ինչպես ԱՄՆ դեսպանատունը նախկինում նշել է, Հայաստանի ժողովրդի խաղաղ հավաքների և ազատ արտահայտման իրավունքը երաշխավորվում է ՀՀ սահմանադրությամբ: Մենք համոզված ենք, որ այս իրավունքները պետք է լիարժեք հարգվեն և նոր կառավարության ձևավորումը պետք է լինի բարեխիղճ բանակցությունների արդյունք»։
Մենք փորձեցինք պարզել, թե ինչ է իրականում տեղի ունեցել եւ ինչպես կարող էր նման մակարդակի հանդիպման ժամանակ ասված խոսքը՝ երբ յուրաքանչյուր բառն ու տառը, կետադրությունը կարեւոր է, հանկարծ սխալ է թարգմանվում։
Մեզ ասացին, որ իրականում թարգմանությունը եղել է ճիշտ, դեսպանը հենց այդ բառերն է ասել եւ մի քանի ժամ այն տեղադրված է եղել կառավարության կայքում՝ առանց դեսպանատան կողմից որեւէ առարկություն առաջացնելու։

Սակայն այդ հաղորդագրությունից հետո ԱՄՆ դեսպանը հանդիպում է ունեցել Նիկոլ Փաշինյանի հետ, ով դառը խոսքեր է ասել նրան՝ մասնավորապես նկատել է, որ սրանով դեսպանը խախտել է դիվանագիտական էթիկան, միջամտել է ՀՀ ներքին քաղաքականությանը եւ դեմոկրատական պրոցեսների հետ կապված մերժելի մոտեցում է դրսեւորել՝ պաշտպանելով գործող իշխանություններին։ Հավանաբար՝ նաեւ զգուշացրել է, որ սա ոչ միայն դիվանագիտական սկանդալի պատճառ կարող է դառնալ, այլեւ հիմք, որ իրենք խզեն դեսպանատան հետ շփումները եւ համարժեք վերաբերմունք դրսեւորեն իրենց նկատմամբ։ Մի խոսքով՝ դեսպանը հասկացել է, որ պետք է շտկել իրավիճակը եւ խնդրել է կառավարությանը ուղղել իր անունից ասված խոսքը։