2017-10-20 16:52:00
ՀՀ հատուկ քննչական ծառայության պետ, արդարադատության գեներալ-լեյտենանտ Վահրամ Շահինյանն ընդունել է Հայաստանի Հանրապետությունում Գերմանիայի ԴաշնայինՀանրապետությանարտակարգ և լիազոր դեսպան Մաթիաս Քիսլերին ու հյուպատոս Ալեքսանդր Բերթհոլդին:
Վահրամ Շահինյանը ներկայացրել է իր ղեկավարած կառույցի գործունեությունն ու կառուցվածքը` ընդգծելով, որ ՀՀ հատուկ քննչական ծառայությունը կոռուպցիոն հանցագործությունների, մարդու դեմ վատ վերաբերմունքի և խոշտանգումների դեմ պայքարին կոչված նախաքննական մասնագիտացված անկախ կառույց է Հայաստանում, և այդ առումով խիստ կարևոր է քննչական աշխատանքի բոլոր նրբություններին լավ տիրապետելն ու զարգացած երկրների համապատասխան իրավապահ մարմինների հետ փորձի փոխանակումը. Նման համագործակցություն արդեն իսկ առկա է Լիտվայի Հանրապետության հատուկ քննչական ծառայության հետ, և կարծում եմ` մեր քննիչների մասնագիտական գիտելիքների կատարելագործման ու փորձի հարստացման նպատակով շատ օգտակար կլինի նաև Գերմանիայի համապատասխան իրավապահ կառույցի հետ համագործակցային կապերի ձևավորումը,-նշել է Վ. Շահինյանը:
Դեսպան Մաթիաս Քիսլերը ողջունել է եվրոպական զարգացած երկրների առաջավոր փորձն ուսումնասիրելու և համապատասխան իրավապահ կառույցների հետ համագործակցության եզրեր փնտրելու` ՀՀ հատուկ քննչական ծառայության նախաձեռնությունը: Դեսպանը, անդրադառնալով Գերմանիայի Դաշնային Հանրապետությունում գործող համապատասխան իրավապահ մարմինների աշխատանքին, պատրաստակամություն է հայտնել նպաստել նշված կառույցների և Հատուկ քննչական ծառայության միջև գործընկերային հարաբերությունների հաստատմանը ու այդ շրջանակներում որոշակի ծրագրեր մշակել փորձի փոխանակման և մասնագիտական վերապատրաստման հարցերի վերաբերյալ:
Միաժամանակ կողմերը նշել են, որ նման համագործակցության առկայության պայմաններում հնարավոր կլինի առավել օպերատիվ կազմակերպել երկու երկրների նախաքննական մարմինների միջև տեղեկատվության փոխանակումն ու էլեկտրոնային եղանակով հարցումների իրականացումը, ինչը կնպաստի նախաքննության որակի և արդյունավետության բարձրացմանը:
Այս նյութը դիտել են - 9618 անգամ