«Լուսավոր սահման» -ի այցը Տավուշի Բարեկամավան և Կիրանց գյուղեր
2017-04-12 22:09:00

«Լուսավոր Սահման» կամավորական նախաձեռնությունը ապրիլի 8-ին հերթական անգամ այցելեց Տավուշի մարզ՝ այս անգամ լուսավորելու սահմանամերձ Բարեկամավան և Կիրանց գյուղերը:
Այցի նպատակը վերոնշյալ սահմանամերձ գյուղերի բնակիչների տներում էներգախնայող-էներգաարդյունավետ լամպերի տեղադրումն էր: Ինչպես նախորդ այցելությունների ընթացքում, այս անգամ ևս նախաձեռնության անդամները կամավորների հետ միասին հանդիպեցին համայնքների ղեկավարների և բնակիչների հետ: Յուրաքանչյուր ընտանիքի տրամադրվեցին 5-ական լուսադիոդային (LED) լամպեր՝ հետագայում նրանց տներում տեղադրելու նպատակով:
«Լուսավոր Սահման»-ն արդեն լուսադիոդացրել է Հայաստանի և Արցախի սահմանամերձ տասը գյուղերի ընտանիքների տներ: Կամավորական նախաձեռնության նպատակն է սահմանամերձ գյուղերում լուսադիոդային լամպերի տեղադրման բարեգործական ակցիայի միջոցով թեթևացնել սահմանամերձ գյուղերի բնակիչների հոգսերը՝ փորձելով կրճատել նրանց էլեկտրաէներգիայի սպառման համար ամենամսյա վճարները և սովորեցնել բնակիչներին խնայողության խելացի միջոցների մասին:

Կիրանց համայնքի ղեկավար Կամո Շահինյանը շատ ոգևորված էր «Լուսավոր Սահման»-ի այցից: «Սահմանամերձ համայնքներին ընձեռվող նման ուշադրությունը շատ գովելի է: Այսպիսով դուք ոչ միայն աջակցություն եք ցուցաբերում գյուղացիներին կենցաղային հոգսերը թեթևացնելու հարցում, այլև ցույց տալիս, որ այս փոքրիկ գյուղի բնակիչների կողքին եք», - նշեց Շահինյանը:
Իսկ Բարեկամավան համայնքում նախաձեռնության անդամներին մեծ ուրախությամբ դիմավորեց ոչ միայն համայնքի ղեկավարությունը, այլ նաև դպրոցական երեխաները, ովքեր ամբողջ այցի ընթացքում ուղեկցում էին նրանց և կամավորներին:

Նախաձեռնության մեկնարկը տրվել է 2016թ. նոյեմբեր ամսին: Այն կյանքի է կոչվել մի խումբ բարերարների ուղղակի և անուղղակի ներդրումներով: Այս պահին հանգանակված գումարի չափը կազմում է մոտ 21մլն. 200 հազար ՀՀ դրամ, որով գնվել է մոտ 9200 LED լամպ և բազում ընտանիքներ այժմ խնայում են ամսական մինչև 4000 դրամ: 
Այցելությանը ընթացքում նախաձեռնության անդամներին և կամավորներին էր միացել Հանրային հեռուստաընկերության Տավուշի մարզի թղթակիցը:

Նախաձեռնությունը բոլորին կոչ է անում միանալ և ներդրում ունենալ սահմանամերձ գյուղերի լուսավորման մեջ՝ մասնակցելով դրամահավաքին հետևյալ հղումով:

Այս նյութը դիտել են - 6048 անգամ