Արա Աբրահամյանն ամռանն էլ չի հասունանա...
2016-03-08 22:04:00

Ռուսաստանի հայերի միության նախագահ Արա Աբրահամյանն իր փոփոխական, անհաստատ պահվածքով հիմար վիճակի մեջ է դրել շատերին: Ամիսներ առաջ նրա հնչեցրած խրոխտ հայտարարություններն այն մասին, թե գալու և ցնցելու է Հայաստանի քաղաքական դաշտի հիմքերը, իսկ հետո դրան հաջորդած կասկածելի լռությունը հուսահատության գիրկն են նետել բոլոր նրանց, ովքեր հույսեր էին փայփայում, որ կսնվեն Աբրահամյանի կերակրատաշտից:


Դրանցից մեկն էլ Հայաստանի Դեմոկրատական կուսակցությունն է: Այս քաղաքական միավորը, որի անունը կա, ամանումը չկա, երազում էր փյունիկի պես վեր հառնել մոխիրներից: Սակայն այժմ կասկածանքի որդը կրծում է դեմոկրատների սիրտը, իսկ կուսակցության նախագահ Արամ Սարգսյանը զգույշ ակնարկում է, որ ստիպված է գլխի ճարը տեսնել առանց Աբրահամյանի: Սարգսյանը, որ նաև Համաշխարհային հայկական կոնգրեսի առաջին փոխնախագահն է, բավարար համարձակություն չունի անձամբ Արա Աբրահամյանին հարցնել առաջիկա ծրագրերի մասին: Ու դրա համար ընդամենը մի բան է ասում. «Երբ նա իր որոշումը կհայտնի, թե ինչ ձևով է մասնակցելու ընտրություններին, այդ ժամանակ կորոշենք: Եթե հայտարարի, ապա միասին կարող ենք անցնել այդ ճանապարհով»:


Իսկ եթե չհայտարարի՞: Չէ, Արամ Սարգսյանն այդ մասին նույնիսկ չի էլ ցանկանում մտածել: Դա ամենասարսափելի մղձավանջը կլինի նրա համար: Դա երկրորդ մահ կլինի ՀԴԿ-ի համար: Ու այդ պատճառով էլ հորդորում է սպասել մինչև ամառ:


Ամառն, իհարկե, հրաշալի ժամանակ է: Այդ օրերին է, որ հասունանում են մրգերը: Ոմանք հույս են փայփայում, որ Արա Աբրահամյանն էլ կհասունանա ամռան արևից, թեպետ, ինչպես հայտնի է, դա անհնար է, քանզի արևի տակ հասունանալը բուսական աշխարհի ներկայացուցիչների մենաշնորհն է`դա եղջերավոր անասունների խելքի բանը չէ:

shame.am

 

Այս նյութը դիտել են - 1262 անգամ